Филмската адаптација на мјузиклот „West Side Story“ на Стивен Спилберг треба да излезе до крајот на годината, а славниот режисер веќе го планира следниот проект - филм за сопственото детство во Аризона, пишуваат американски медиуми.
Variety пишува дека има големи шанси главната женска улога, инспирирана од ликот на мајката на Спилберг, да ѝ припадне на познатата актерка Мишел Вилијамс.
Со оглед на фактот дека Спилберг првпат снима приказна за сопствениот живот, режисерот одлучи да го пишува сценариото со неговиот долгогодишен соработник добитник на наградите Тони и Пулицер, Тони Кушнер, со кого соработуваше во научно-фантастичната драма „A.I. Artificial Intelligence“ во 2001 година, како и во филмовите „Munich“ (2005) и „Lincoln“ (2012).
Славниот режисер е роден во Синсинати во 1946 година во ортодоксно еврејско семејство, но семејството се преселило во Аризона десет години подоцна, каде што младиот Стивен ја прославил својата бар мицва, церемонија за полнолетство, а во адолесцентските денови ги снимил првите аматерски филмови.
Таткото на Спилберг, Арнолд, иноватор и инженер, кој работел во General Electric во одделението за развој на компјутери, почина минатото лето на возраст од 103 години. Неговата мајка Леа Адлер, која беше сопственик на кошер ресторанот „The Milky Way“ во Лос Анџелес, почина во 2017 година на 97-годишна возраст.
Во многу секвенци од неговите филмови до денес, има многу детали засновани врз лични искуства, но славниот режисер никогаш претходно не ја спомнал можноста за снимање на биографски филм.