Врховниот суд во Колорадо одлучи дека Доналд Трамп не може да се кандидира за претседател следната година во таа држава, повикувајќи се на уставната клаузула за бунт.
Судот пресуди дека Доналд Трамп не е квалификуван кандидат бидејќи учествувал во немирите во американскиот Капитол пред речиси три години.
Тоа е прва употреба на делот 3 - 14-ти амандман на Уставот на САД за дисквалификување на претседателски кандидат.
Слични обиди да се исфрли Трамп од гласачките места во Њу Хемпшир, Минесота и Мичиген не успеаја.
Одлуката од вторник, која е ставена во мирување до следниот месец, не се однесува на други држави освен Колорадо. Штабот на Трамп веќе најави жалба и одлуката ја нарече антидемократска.
Одлуката се однесува само на прелиминарните избори во државата на 5 март, кога републиканските гласачи ќе го изберат својот претседателски кандидат, иако тоа може да влијае и на општите избори во Колорадо следниот ноември.
Во својата одлука, судиите напишаа: „Не доаѓаме лесно до овие заклучоци. Свесни сме за големината и тежината на прашањата што сега се пред нас. Исто така свесни сме за нашите свечени должности да го применуваме законот, без страв и без да нè поколебаат реакциите на јавноста на одлуките што законот налага да ги донесеме“.
Одлуката ја поништува претходната одлука на судијата во Колорадо, кој одлучи дека забраната на 14-тиот амандман против бунт не се однесува на претседателите бидејќи делот конкретно не ги споменува.
Истиот судија од понискиот суд, исто така, го прогласи Доналд Трамп за соучесник во немирите во американскиот Капитол. Неговите поддржувачи упаднаа во Конгресот на 6 јануари 2021 година, додека пратениците ја потврдија изборната победа на претседателот Џо Бајден.
Одлуката на Врховниот суд во Колорадо стапува на сила на 4 јануари 2024 година. Тоа е пред крајниот рок на сојузната држава да ги објави претседателските избори.
Трамп загуби во Колорадо со голема разлика на последните претседателски избори. Но, ако судовите во поконкурентните држави го следат примерот на пресудата од вторникот, кандидатурата на Трамп за Белата куќа може да се соочи со сериозни проблеми.
Четиринаесеттиот (14) амандман бил ратификуван по Американската граѓанска војна. Дел 3 имал за цел да ги спречи сецесионистите да се вратат на нивните претходни улоги во владата откако јужните држави повторно се приклучиле во Унијата.
Тоа било искористено против конфедералниот претседател Џеферсон Дејвис и неговиот потпретседател Александер Стивенс, кои служеле во Конгресот. Оттогаш, ретко се повикувале на овој амандман.
Трамп се соочува со четири кривични судски процеси, вклучително и еден федерален и еден државен случај во Џорџија, поврзани со неговите наводни изборни субверзии.
