Бројот на заболени во светот надмина 30 милиони, а ниту по девет месеци од пандемијата не се гледа нејзиниот крај. Светската здравствена организација предупреди на сериозноста на ситуацијата во Европа.
И покрај овие бројки, политичарите низ светот изведуваа бизарни ритуали зборувајќи како тие се штитат од вирусот и ги советуваа луѓето што да прават, иако не се стручни за тоа. Некои од нив на крајот и се заразија со коронавирусот.
Вчера беше објавено дека 24 парламентарци од индиската држава Раџастан заболеле од COVID-19. Меѓу нив е и Сукбир Синг Јануапурија кој пред еден месец беше снимен како седи во кал и дува во школка, тврдејќи дека тоа го чува од SARS-Cov-2.
Претседателот на Белорусија, Александар Лукашенко изјави дека на самиот почеток на пандемијата, кога светот не ни знаеше со што се соочува, дека возењето со трактор и одењето во сауна го чува од вирусот, пред да биде тестиран дека е позитивен.
Можеби најпознатата бизарна изјава, а чиј совет го послушаа многу луѓе, е онаа на американскиот претседател Доналд Трамп кој сугерираше научниците да проверат дали пиењето и вбризгувањето на средства за дезинфекција може да биде лек за коронавирус.
На оваа листа од бизарни изјави е и онаа на филипинскиот претседател Родриго Дутерте кој на луѓето им кажа нивните маски да ги дезинфицираат со бензин, инсистирајќи дека не се шегува.
„На крајот на денот, закачете ја негде маската и испрскајте ја со Lysol ако може да си го дозволите“, изјави Дутерте, спомнувајќи го познатиот бренд за дезинфекција. „Луѓето кои немаат Lysol нека употребат бензин или дизел. Само најдете бензиска станица и таму намокрете ја маската“, изјави тој во една прилика.
