Скоро половина од над 3,4 милиони смртни случаи од COVID-19 пријавени досега ширум светот се случиле во Америките, но вистинските бројки можно е да се поголеми, предупреди во средата Панамериканската здравствена организација (ПАХО).
Минатата недела, Светската здравствена организација (СЗО) објави дека смртноста од COVID-19 е значително потценета ширум светот.
„Според новите проекции, многу повеќе луѓе умираат од компликации поврзани со COVID-19, или од индиректните ефекти на пандемијата, како што се нарушувања на основните услуги, кои го загрозија нивното здравје“, рече директорката на ПАХО, Кариса Етјен.
Во 2020 година, бројот на починати достигна 1,8 милиони, но сега се проценува дека вистинскиот број на смртни случаи предизвикани од коронавирусот е близу три милиони луѓе, што е скоро двојно повеќе од минатата година.
„Загрижувачки е што половина од овие смртни случаи се случија овде во Северна, Централна и Јужна Америка, што покажува прекумерно влијание на оваа пандемија во нашиот регион“, рече Етиен.
Минатиот петок, бројот на смртни случаи од COVID-19 во Латинска Америка надмина еден милион, а пандемијата се влошува во регионот со најголема стапка на смртност по глава на жител во светот.
Директорката на ПАХО рече дека заразените и починатите од COVID-19 во Латинска Америка достигнале алармантно високо ниво, а земјите од регионот минатата недела се најдоа меѓу првите пет во светот.
Чиле, Перу и Парагвај забележаа пад на бројот на нови инфекции, но Уругвај, Аргентина и Бразил повторно бележат зголемување на случаите, додека Боливија бележи драстично зголемување на смртноста, рече таа. Многу луѓе во регионот веќе не се придржуваат до мерките против COVID-19, предупреди Етјен, а ПАХО предупреди дека пристигнала нова закана.
Индискиот сој на коронавирус е откриен во десет сојузни држави во САД, главно поврзан со меѓународни патувања, рече Силвен Алдигиери, менаџер во ПАХО.
Откриени се случаи во Северна, Централна и Јужна Америка, како и на Карибите, иако ниту еден пренос во заедницата не е поврзан со овој сој, рече тој. Иако е позаразна, не постојат докази дека индиската варијанта е посмртоносна од оние соеви што веќе ги има во Америките.
