Британскиот магазин „The Guardian“ одлучи да ни ја прикаже една од најдобрите држави во Европа, но и во светот – Финска.
Листата на новинарот Џон Хенли претставува детална анализа околу тоа што е тоа толку добро што се крие на север во Европа.
Минатата година Финска според најверодостојните меѓународни тела, беше оценета како најстабилна, најбезбедна и најдобро водена светска држава. Покрај тоа, таа е и трета најбогата земја, трета со најмалку корупција, трета по социјалниот статус на граѓаните и втора најпрогресивна по социјални прашања.
Стабилни банки, сигурна полиција, правосудство без корупција
Банките се најстабилни, домашните компании се втори по ниво на етичност, граѓаните имаат доверба во полицијата, а финското правосудство се смета за најнезависно. Трети се по најголема полова еднаквост, а имаат и петта најмала нееднаквост во распределбата на богатството.
Децата им се најбезбедни, тинејџерите се втори во светот во социјалните и трети во природните науки, набројува Хенли, кој тајната на финскиот успех одлучил да ја открие преку неколку соговорници. Започнал со Бенгт Холмстром, економист кој во 2016 година добил Нобелова награда за економија.
Финско чудо
„Можеме да зборуваме за финско чудо, ако се сетиме каде сме биле пред 150 години. Добро прашање е, како се случило тоа?“, вели Холмстром и додава дека треба да се биде внимателен во потрагата по „формула за успех“. На светот нема две исти држави и не мора да значи дека она што успеало во Финска исто така би успеало и во некоја друга држава. Поранешната претседателка на Финска смета дека живее во ладна, остра и зафрлена област, односно дека секоја личност мора напорно да работи за себе, но и за своите соседи. Од социолошка страна, треба да се потсетиме дека Финска била и демократски сиромашна после 600 години поминати под шведска и сто години под руска власт.
Сите се еднакви во Финска
„Разликите меѓу социјалните класи во Финска биле мали и тоа уште пред нашата независност. Дури и индустриската револуција овде беше скромна“, објаснува социологот Рита Јалиноја. Финците гледаат еднакво едни на други, кај нив не се гледа од „висина“ кон другите луѓе.
„Можете да се движите по улиците рамо до рамо со најбогатиот човек во градот, а да немате поима за тоа“, смета поранешен американски пратеник во Хелсинки, Брус Орек, на кого животот во финската метропола му се допаднал толку што останал да живее таму.
„Денеска сите работиме заедно и во колектив се бориме за иста цел“, вели тој.
