Во шестиот натпревар од Стенли куп финалето тимот на Тампа Беј Лајтнинг со 2:0 го совлада Далас Старс и ја освои својата втора титула во историјата.
За Тампа повторно на мразот не беше македонскиот Канаѓанец Стивен Стамкос кој мака мачи со повреда, но успеа да настапи барем на еден натпревар во финалната серија.
Во 13. минута од првата третина Брејден Поинт погоди за водство искористувајќи ја предноста од играч повеќе по исклучувањето на Швеѓанецот Јон Клињбериј.
На 2:0 зголеми Блејк Колман во 8. минута од втората третина, а до крајот Далас не успеа ниту да се врати во игра и за прв пат во финалната серија не постигна гол.
Тампа Беј го дoби Стенли куп финалето со 4-2 во партии и ја освои втората титула во својата историја. Формиран во 1992, тимот на Тампа од истоимениот град на Флорида првпат триумфираше во сезоната 2003/04 кога со 4-3 во партии славеше над Калгари Флејмс.
Иако не играше ниту ноќеска, Стамкос како капитен го подигна долго посакуваниот пехар. Тој сезонава одигра 58 натпревари од кои само 1 после прекинот. Постигна 29 голови во регуларниот дел и 1 во финалната серија, а забележа и 37 асистенции или вкупно 66 поени.
Стамкос е внук на бегалци од Граѓанската војна во Грција, етнички Македонци од селото Арменско. Неговата мајка е Шкотланѓанка.