Помеѓу облаците на Орионовата маглина, астрономите забележаа млада ѕвезда која „намотува“ материјал од својата околина.
Соѕвездието Орион е познато по тоа што се наоѓа на т.н небесен екватор, поради што е видливо од секој дел на планетата Земја. Некаде помеѓу неговите светли ѕвезди Алнитаи, Саиф и Ригел, лебди огромен и густ облак од меѓуѕвездена прашина и гас - Орионовата маглина.
Таа е толку голема и впечатлива што е видлива со голо око, а покрај спектакуларниот изглед, кој е снимен со помош на вселенски телескопи, овој меѓуѕвезден простор е и важна лабораторија за проучување и разбирање на формирањето на ѕвездите.
Научниците тврдат дека сѐ што треба да направите е да зумирате на одреден дел и внимателно да ги проучите деталите. Најновата фотографија од Орионовата маглина, направена од вселенскиот телескоп Hubble, покажува редок феномен во кој може да се види облак во темнината на вселената, во средината на која се одвива космичка интеракција иницирана од младата ѕвезда IX Ори.
Процесот е познат и како објект Хербиг-Харо, за чие создавање се потребни одредени специфични околности. Пред сè, потребна ви е млада ѕвезда која се врти и „намотува“ материјал од облакот околу себе. Со текот на времето, таа расте, овозможувајќи млазови од плазма да се ослободат меѓу половите на ѕвездата и да се пренасочат по линиите на надворешното магнетно поле - давајќи ѝ забрзување.
Потоа овие млазови, кои патуваат со неверојатно големи брзини, силно се судираат со околниот гас и го загреваат, предизвикувајќи му да свети. Тоа доведува до појава на две блескави шипки, кои изгледаат како да излегуваат од ѕвездата.
Астрономите истакнуваат дека овие структури брзо се менуваат, што им дава идеална можност да ги проучуваат за да разберат како материјалот се исфрла од облаците кои ги хранат растечките ѕвезди и ја одредуваат големината до која ќе пораснат.
