Тимоти Шаламе се прослави со улогата во драмата Call Me By Your Name од 2017 година и за само седум години стана најбараниот млад актер во Холивуд.
Неговите успеси се редат еден по друг, а според порталот Dexerto, Шаламе штотуку соборил рекорд што го држел само еден актер пред него.
Благодарение на главните улоги во филмовите Dune: Part Two, чија премиера беше на почетокот на месецот, и Wonka, чија премиера беше во декември, Шаламе се појави во два блокбастера по ред за помалку од осум месеци.
Пред него, тоа му успеа само Џон Траволта, најбараниот актер во 70-тите. Во декември 1977 година, Траволта се појави во светскиот хит Saturday Night Fever, а шест месеци подоцна ја играше главната улога во мјузиклот Grease, кој многумина го сметаат за најдобар филмски мјузикл на сите времиња.
Saturday Night Fever (Треска на саботната вечер) заработи над 237 милиони долари во кината, додека Grease (Брилијантин) заработи над 366 милиони долари. Вкупните трошоци за снимање на овие два филма беа помалку од десет милиони долари.
Мјузиклот Wonka со Шаламе заработи 628 милиони долари, додека Dune: Part Two, кој уште игра во кината, досега има заработено 494 милиони долари. Експертите предвидуваат дека вториот дел на Dune би можело да достигне заработка од една милијарда долари.
По два блокбастера по ред, Шаламе моментално глуми во биографскиот филм A Complete Unknown, базиран на животот на Боб Дилан.
