Отровните животни отсекогаш ја привлекувале љубопитноста на научниците и љубителите на природата. Но, дали некогаш сте се запрашале кои животни имаат отров што најбрзо делува?
Порталот Science Insider претстави четири животни со најбрзиот отров во светот, а сите четири живеат во Австралија. Пресметувајќи чиј отров е најсмртоносен и најбрз, ја земале предвид јачината на отровот, дозата што ја внесуваат во човечкото тело и брзината на дистрибуција.
На местото број четири се наоѓа пајак. Да потсетиме дека на Земјата има повеќе од 40 илјади видови пајаци и повеќето од нив се отровни, но само неколку од нив претставуваат опасност за човечкиот живот.
Најопасен меѓу нив е сиднејскиот инка-мрежест пајак (Atrax robustus). Неговиот отров е 60 пати посилен од цијанидот, а ако ве касне може да умрете за час или два. Отровот го напаѓа нервниот систем, кој се преоптоварува и на крајот се исклучува.
Пајаците не се единствените отровни жители во Австралија, која е дом на 20 од 25-те најсмртоносните змии во светот, вклучувајќи ја и источната кафена змија (Pseudonaja textilis), која е одговорна за најмногу смртни случаи од каснување од змија во Австралија. Нејзиниот отров е осум илјади пати посилен од цијанидот и може да убие човек за помалку од еден час. Го напаѓа и нервниот систем и го забавува сѐ додека не се исклучи. Во исто време, отровот содржи компонента за згрутчување на крвта.
Синопрстенестиот октопод (Hapalochlaena lunulata) има отров илјада пати посилен од цијанидот. Човек може да умре од овој отров во рок од 20 минути. Бактериите во неговата плунка создаваат исклучително силен невротоксин кој ги парализира мускулите. Штом таа парализа ќе стигне до дијафрагмата и мускулите околу ребрата, потребни се само неколку минути за да настапи смрт.
Сепак, едно од морските животни во Австралија е крајниот убиец, чиј отров е најбрз и најефикасен кога станува збор за неговите жртви.
Станува збор за медуза, т.н. морска оса (Chironex fleckeri). Нејзиниот отров не е најотровен, тој е „само“ две илјади пати посилен од цијанид, но оние што ги допрело ова суштество умреле за 15 минути. Тоа е затоа што нивните пипала се покриени со ситни отровни пикада, наречени нематоцисти, кои исфрлаат токсини што го запираат срцето.
