Во 2023 година, Toyota ја задржа својата позиција како производител со најголема продажба во светот, повторно претекнувајќи го германскиот гигант Volkswagen.
Јапонскиот гигант минатата година продаде 11,2 милиони возила, вклучувајќи мали автомобили Daihatsu и камиони Hino Motors, што е за 7,2 отсто повеќе од 2022 година.
Овие две подружници и Toyota Industries се соочуваат со проблеми во врска со процедурите за тестирање на автомобили и мотори кои можат да ја нарушат глобалната репутација на брендот.
„Би сакал длабоко да им се извинам на нашите клиенти за непријатностите и загриженоста предизвикани од неправилностите во Hino Motors, Daihatsu и Toyota Industries“, изјави претседателот на Toyota Акио Тојода на новинарите на настанот за објавување на визиите на Toyota Group. Групацијата ја основал неговиот прадедо.
Глобалната продажба на Toyota Group надмина 10 милиони возила во девет од изминатите десет години, освен во 2020 година, кога пандемијата му нанесе удар на автомобилскиот сектор.
На второто место во глобалното рангирање е германската групација Volkswagen, која минатата година испорача 9,2 милиони возила, 12 отсто повеќе од 2022 година, што сигнализира закрепнување од пандемиските проблеми во синџирот на снабдување.
Јапонската групација продаде 10,3 милиони возила минатата година, од кои една третина беа бензинско-електрични хибриди. Уделот на електрични возила на батерии е помал од еден процент.