Ако во моментов се одржат внатрешни избори, Доналд Трамп би бил фаворит на републиканците за кандитат на претседател на САД во 2024 година, покажуваат резултатите од анкетата на Politico-Morning Consult.
Резултатите се објавени денеска, три дена по ослободителната пресуда на Трамп на неговото второ судење за импичмент за случувањата на 6 јануари во Капитол, пишува Guardian.
Меѓу републиканците, 59 отсто рекле дека сакаат Трамп да има важна улога во нивната партија, што е за 18 поена повеќе во однос на последната таква анкета, а 54 отсто рекле дека ќе го поддржат Трамп да се кандидира за претседател.
Десетици илјади републиканци ја напуштија партијата по инцидентот во Капитол, а повеќето Американци се изјаснија дека не сакаат Трамп да се занимава со политика никогаш повеќе.
Иако 45-тиот претседател до изборите во 2024 ќе има 78 години, ќе може повторно да се кандидира ако одлучи така.
