Американскиот претседател Доналд Трамп денеска се очекува да ја потпише извршната наредба за реформа на полицијата по случајот со убиството на Афроамериканецот Џорџ Флојд и масовните протести против полициската бруталност што се разгореа низ целата земја.
„Крајната цел е да имаме закон и ред и сакаме тоа да се постигне чесно, праведно и сигурно“, рече вчера Трамп, нагласувајќи дека силите за безбедност „главно ги сочинуваат добри луѓе“.
Трамп минатата недела навести дека размислува за идејата за вклучување поголем број социјални работници во работата на полицијата, како и за поставување на полициски стандарди на национално ниво.
Протестите низ САД се одржуваат од минатиот месец, откако Афроамериканецот Џорџ Флојд почина поради полициска бруталност за време на апсење. Полицаецот, кој оттогаш е отпуштен од работа и ќе му се суди за убиство, со колено го притискал Флојд на вратот, иако тој го молел да се исправи и му кажувал дека не може да дише.
Активисти на левицата бараат намалување на средствата за полицијата и пренасочување на тие пари за социјални програми, додека порадикалните струи бараат целосно укинување на полицијата.