Поранешниот фудбалер на Милан со неочекуван трансфер: ќе игра во втората италијанска лига и тоа во новиот тим на Силвио Берлускони.
По неуспешната авантура лани во Фиорентина, Кевин-Принс Боатенг замина на позајмица во турски Бешикташ, но реши ни таму да не остане долго. Сагата околу неговиот нов клуб сега доби крајно неочекувана завршница бидејќи репрезентативецот на Гана потпиша со Монца, новопласираниот клуб во Серија Би.
Боатенг се обврза на договор од една година со опција да биде продолжен за уште една доколку и двете страни се задоволни.
Не е случајност тоа што Боатенг доаѓа во Монца. Овој клуб кој лани играше во третата лига е новиот проект на Силвио Берлускони, поранешниот газда на Милан. Во негово време Боатенг одигра 3 и пол сезони за „Росонерите“, што беше и врвот на неговата кариера. Во Монца Берлускони го донесе и Адријано Галијани, поранешниот извршен директор на Милан.
Во својата богата кариера 33-годишниот Боатенг настапуваше уште и за Херта, Тотенхем, Борусија (Д), Портсмут, Шалке, Лас Палмас, Ајнтрахт, Сасуоло и Барселона.
Амбициите на Монца се веднаш да се избори за пласман во Серија А и веќе во сезоната 2021/22 да игра против Милан. Веќе има големо засилување за таа цел.
