Поранешната ѕвезда на францускиот фудбал е уверен дека неговиот млад сонародник во иднина ќе стане најдобриот фудбалер на светот.
Според Давид Трезеге, Килјан Мбапе е вистинскиот наследник на Лео Меси и Кристијано Роналдо, најдобрите фудбалери во изминатите речиси дваесетина години.
„Тој е на вистинската патека. Сам успеа да се постави како вистински наследник на Меси и Роналдо. Со неговите перформанси тој има најголеми шанси да го преземе нивниот примат“, смета Трезеге во изјава за Le Parisien.
Младиот Французин според зборовите на некогашната ѕвезда дефинитивно еден ден ќе ја освои Златната топка и тоа веројатно во повеќе наврати, како што правеа Роналдо и Меси.
„Морам да признаам дека тој секогаш ме воодушевува. Големите натпревари им припаѓаат на големите играчи. Не го велам ова тривијално. Килјан уште еднаш ја покажа својата брилијантност. Тоа е одлика на велемајсторите“, вели Трезеге алудирајќи на неговиот настап завчера против Баерн во Лигата на шампионите кога со два гола среде Минхен му донесе победа на својот ПСЖ.
„Многу помотивиран е на ваквите важни натпревари од високо ниво. Веќе имавме видено вакво нешто против Браселона. Тој остава впечаток на леснотија. Силен е и физички и во својата глава“, додава поранешниот голгетер.
„Кога се очекува од него, тој одговара. Понекогаш тоа не се приметува лесно во Лиг 1, иако неговата статистика исто така зборува за неговите дела“.
Сега 43-годишниот Трезеге кариерата ја заврши во 2014 година, а претходно 10 години настапуваше за Јувентус. Играше и за Платенсе, Монако, Еркулес, Банијас, Ривер Плејт, Њуел'с Олд Бојс и Сент Роч'с.
Со репрезентацијата на Франција стана светски шампион во 1998 година и европски шампион во 2000, а постигна вкупно 34 голови на 71 натпревар.
