Технологиите коишто ги користи НАСА на три начини го подобрија квалитетот на животот на Земјата.
Технологиите на американската вселенска агенција се користат во борбата против загадувањето на воздухот, во земјоделството и во отстранувањето отровни материи од средината.
Лунарната прашина може да ги оштети очите и белите дробови на астронаутите, како и нивната опрема. Поради тоа, НАСА разви високо чувствителни сензори со коишто се мери концентрацијата на оваа прашина во текот на мисии во вселената.
Сега, оваа технологија се користи на Земјата. Canary S детекторот регистрира загадувачи како што се метанот и јагленмоноксидот. Во САД се користи за следење на квалитетот на воздухот во близина на училишта како и за следење на загадување на воздухот во текот на шумските пожари.
Веќе една деценија НАСА произведува дронови кои се користат на Марс. Тоа беше клучно за развој на дронови кои се користат на Земјата. Овие летала се многу корисни за земјоделците, ги користат за да извршат преглед на земјиштето што го обработуваат.
Експертите на НАСА осмислија начин како да се борат против една од најштетните работи коишто луѓето ги имаат направено. Станува збор за токсинот полихлориран бифенил (PCB) чија употреба сега е забранета. Меѓутоа, потребно е да биде отстранет од околината.
НАСА разви цевки наречени ecoSPEARS кои можат да се вкопаат во земјиштето. Станува збор за реагенс којшто го отстранува PCB од средината, наведуваат од Светскиот економски форум.
