Хари Мегваер (29) пред три години стана најскапиот дефанзивец во историјата. Сепак, откако Манчестер Јунајтед му плати на Лестер 87 милиони евра отштета за него, на Мегваер му оди од лошо на полошо. Минатата сезона стана предмет на потсмев поради бројните незгоди, а потоа оваа сезона ја загуби капитенската лента и статусот на првиот состав во Јунајтед.
Од осум натпревари оваа сезона, тој беше стартер на само три. Сепак, тренерот Саутгејт и понатаму верува во него, па Мегваер беше член на стартната постава во петтиот од шесте натпревари во групата на Лигата на нации. За Англија и Мегваер тоа натпреварување заврши со дебакл, со само три бода и последно место во конкуренција на Италија, Унгарија и Германија, поради што од елитата паднаа во второлигашот во Лигата на нации.
Во последното коло на Вембли, Англија играше против Германија (3:3), а првиот гол го примија по неверојатната, двојна грешка на Хари Мегваер. Најпрво непречено му ја додаде топката на нозете на противничкиот офанзивец Џамал Мусијала, а потоа во навлегувањето кон голот во обид да ја исфрли топката го расече по нозете во шеснаесетникот.
Мусијала падна, но судијата Дани Макели даде знак за продолжување на играта. Сепак, откако ја прегледа снимката, тој покажа на пеналот од кој погоди Гундоган. Мегваер потоа направи сериозна грешка на другиот крај од теренот. Тргна во напад и се мачеше со топката во противничката половина. Така тој несмасно ја загуби, а Германците откако му ја одзедоа топката тргнаа во контранапад, кој го заврши Каи Хаверц со прекрасен гол.