Кога се среќаваат репрезентациите на Англија и Германија припадниците на полициските сили секогаш имаат полни раце работа. Дуелите на овие две нации речиси никогаш не минале без инциденти, како што беше случај и синоќа во пресрет на дербито на „Вембли“ во последното коло од Лигата на нации.
Пред натпреварот на „Вембли“ англиските навивачи традиционално се собираат во пабовите во близина на стадионот. Понекогаш и со нивните деца седнуваат на пијачка пред репрезентативните натпревари. Тоа добро го знаеле германските хулигани кои направиле пеколен план инспирирали од легендарната приказна за Троја.
Во еден од таквите пабови, поточно Green Pub, се појавила група германски навивачи облечени како Англичани, во дресови на домашнта репрезентација на Англија. Така облечени не привлекле внимание, одлично се вклопиле во пабот како Тројанскиот коњ кој Ахајците им го подариле на Тројанците. Одеднаш извадиле ладно оружје и направиле хаос. Мавале по кого стигнат, а го демолирале и пабот. Исходот е 5 луѓе кои се здобиле со тешки повреди и се наоѓаат во болница, додека уште 20 навивачи се здобиле со полесни повреди.
До тепачката дошло два часа пред почетокот на натпреварот, отприлика во моментот кога навивачите се подготвувале да тргнат накај стадионот. Англиските медиуми дури и пишуваат дека германските хулигани напаѓале и постари жени и деца и дека не бирале по кого ќе удрат.
За време на нападот Германците на Англичаните им одземале знамиња и навивачки транспаренти, а кога се појавцила полицијата почнале да бегаат.
Инаку, интересно беше и на зелениот терен меѓу лутите ривали Англија и Германија бидејќи одиграа возбудлив натпревар со пресврти и многу голови, а на крајот победник немаше бидејќи дуелот заврши 3:3.