Премиерката на Обединетото Кралство, Лиз Трас, поднесе оставка од оваа функција по нешто повеќе од еден месец откако ја презеде, а корисниците на социјалните мрежи едвај чекаа да го објават победникот на бизарниот облог кој неодамна се појави на интернет.
Имено, британскиот таблоид Daily Star минатиот петок организираше бизарен натпревар помеѓу премиерката и главица зелената салата. Читателите беа прашани дали мислат дека Трас, која беше на удар во последните денови, ќе ја изгуби работата пред зеленчукот да изгние.
Овој потег на таблоидот уследи по коментарите во колумната на магазинот The Economist кој напиша дека Трас има „рок на траење како зелена салата“. Иако сè настана во потсмевачко-шеговит контекст, на крајот се оствари. Трас го „изгуби облогот“ од зеленчукот.
За кратко време од нејзината одлука, социјалните мрежи беа преплавени со мемиња од корисници кои едвај чекаа да уживаат во моменталната ситуација, а многу од нив всушност навиваа за салатата.
„Салатата, сепак, е вистинскиот победник“, напишаа корисниците, додавајќи дека Трас е единствениот премиер кого „го надживеала салата“.
Некои „поиграа“ и со тоа како изгледа зеленчукот откако прогласи победа.
Некои забележаа и како премиерката се повлече само еден ден откако го изрази својот „борбен дух“.
Еден корисник истакна дека неговата „најкратка врска“ траела подолго отколку што траела Трас како премиер, додека други го предложија идеалниот следен кандидат за оваа позиција, наведувајќи го мачорот Лери кој е долгогодишен „жител“ на Даунинг Стрит.
Некои се пошегуваа и за премиерската резиденција, прогласувајќи ја за „идеално место за краток престој“.
По само 45 дена како премиер, Лиз Трас поднесе оставка како лидер на британската Влада. Со овој потег таа стана премиер со најкраток мандат во историјата на британската демократија.