Срѓан Јанковиќ (50) и Дејан Драгијевиќ (50) од околината на Бор, кои се осомничени дека ја убиле Данка Илиќ (2), а потоа се обиделе да ѝ го скријат телото и покрај тоа што мислеле дека имаат совршен план, не го зеле предвид фактот дека и делото и криењето на телото се извршени во службеното возило на ПУК „Водовод“, во кое е вграден GPS, пишува Nova.rs.
Работниците на борското јавно комунално претпријатие „Водовод“ Срѓан Јанковиќ (50) од село Лука и Дејан Драгијевиќ (50) од село Злот се осомничени дека сториле кривично дело тешко убиство, на штета на двегодишната Данка Илиќ. Тие, наводно, на 26 март прво удриле во Данка со службената „фиат панда“, која ја управувал Драгијевиќ. Детето наводно не било усмртено од ударот, туку, по кажувањето на еден од нив, плачело на патот и потоа било ладнокрвно задавено. Тогаш Јанковиќ, го ставил нејзиното тело во задниот дел од автомобилот.
Потоа наместо да го однесат детето во најблиската здравствена установа или да се јават во итната помош и полиција, тие смислиле план да го сокријат телото на девојчето и да молчат за делото. Според полициската реконструкција на настанот, тие со автомобил се упатиле до ѓубриштето на Старобањски пут, каде што го фрлиле телото на девојчето.
Очигледно не биле свесни за фактот дека цело време имале GPS локатор во нивниот автомобил, што го олеснувало одредувањето каде се наоѓаат, колку долго престојуваат на одредени локации. Бидејќи безбедносните камери снимиле дека тие биле во Бањско Поле на кобниот ден на исчезнувањето на детето, полицијата набрзо дошла кај нив да собере информации за тој ден, а потоа им била извршена полиграфска проверка. И двајцата одговарале на полиграфски тестови.
Додека траела потрагата по Данка Илиќ во Бањско Поле, нејзиниот татко наишол на возилото „фиат панда“ на работниците во јавното комунално претпријатие, прашал дали го виделе детето, на што тие одговориле негативно.
Едниот од осомничените, наводно, два дена по убиството се вратил на местото каде го фрлиле телото и го преместил. Извори од истрагата велат дека двајцата осомничени си ја префрлаат вината и не може да им се верува во изјавите што ги даваат.