Европската фудбалска унија (УЕФА) не размислува за започнување на ново натпреварување и е целосно фокусирана на подобрување на постоечките, соопштија од седиштето на европската куќа на фудбалот.
Ова појаснување дојде како резултат на пишувањето на бројни светски медиуми дека од 2027 година ќе започне ново натпреварување, кое всушност би можело да претставува некоја верзија на забранетата Суперлига.
„УЕФА не работи на проект од таков тип. Ние јасно ставивме до знаење дека сме против формирањето на Суперлигата и тоа го документиравме“, се вели во соопштението на УЕФА, при што се додава:
„Работиме на подобрување на форматот на натпреварувањето од 2024 година во кое доминантно влијание за пласманот во Европа ќе имаат резултатите во националните првенства. Навивачите ќе добијат поголем број квалитетни натпревари во кои секој натпревар ќе биде исклучително интересен“.
За потсетување, во понеделникот светските медиуми објавија информација дека УЕФА стартува ново натпреварување кое би се состоело од три лиги од по 18 клубови, во кое би имало испаѓање и промоција во повисок ранг.