Обединети од фудбал. Обединети во срцето на Европа - ова е новиот слоган за наредното Европско првенство за кое УЕФА синоќа го претстави и официјалното лого.
Точно во 20 часот и 24 минути по средноевропско време, за да ја симболизира годината на одржување на 17-тото Европско првенство, синоќа на „Олимпиаштадион“ во Берлин домаќините на спектакуларен начин со светлечко шоу на европската јавност ѝ го презентираа логото кое ќе биде заштитен знак на ЕУРО 2024.
„Логото на турнирот произлегува од боите на знамињата на 55-те членки на УЕФА, кои подредени во различни комбинации го красат покривот на 'Олимпиаштадион'. Познатио пехар Куп Анри Делано се наоѓа на средината од логото, додека 24-те парчиња во боја околу него ги претствауваат 24-те репрезентации учеснички на ЕУРО“, објаснува УЕФА.
Целосното видео со светлечкото шоу може да се погледне тука.
Ако внимателно се погледне логото, боите навистина претставуваат знамиња и тоа дури и одредени држави. Почнувајќи од долу лево се гледа прво знамето на Германија, а потоа одејќи нагоре доаѓаат Унгарија и Италија (гледајќи хоризонтално и вертикално), Франција и Холандија, Белгија, Литванија, Романија, Естонија, Бугарија, Ерменија, Украина и на крајот десно долу доаѓа Ирска.
Слоганот „United by Football. Vereint im Herzen Europas“ е двојазичен и ја претставува обединетоста на Европа и земјата домаќин која се наоѓа во средината на континентот и која во 2024 година ќе биде центар на фудбалска Европа.
Брендирањето на ЕУРО 2024 беше претставено од претседателот на УЕФА - Словенецот Александер Чеферин, в.д. претседателот на Германската фудбалска асоцијација - Рајнер Кох, турнир директорот на ЕУРО 2024 - Филип Лам, како и претставници на градовите Берлин, Дортмунд, Диселдорф, Гелзенкирхен и Штутгарт и други високи претставници од земјата домаќин.
Наредното ЕУРО ќе се игра од 14 јуни до 14 јули 2024 година во 10 града ширум Германија и тоа Берлин, Минхен, Дортмунд, Гелзенкирхен, Штутгарт, Хамбург, Диселдорф, Келн, Франкфурт и Лајпциг. Квалификациите ќе почнат во март 2023, а ќе завршат со баражите во март 2024. На завршницата ќе биде одигран вкупно 51 натпревар.