Украинскиот политичар Олександар Мережко, кој претседава со Одборот за надворешни работи и меѓупарламентарна соработка, објави лажно видео од гранатирање на Париз за да укаже дека секоја земја може да се најде под агресија. Но, некои луѓе поинаку ја сфатија неговата порака.
На почетокот од видеото, неименувана девојка позира додека во позадина се гледа Ајфеловата кула. Одеднаш почнува гранатирањето и настанува паника.
„Замислете само ова да се случеше во некоја друга европска престолнина“, е напишано во видеото.
Авторот потоа го цитира украинскиот претседател Володимир Зеленски.
„Ќе се бориме до крај. Дајте ни шанса да преживееме. Затворете го небото над Украина и испратете ни воздушни ловци. Ако паднеме ние, ќе паднете и вие“.
„И ние мислевме дека ова никогаш нема да се случи“, наведе Мережко.
Реакциите на Twitter се различни, но претежно негативни.
„Разбирам што сакаш да порачаш со видеово, но треба да престанеш со ширење паника без потреба. Постојат луѓе кои на прв поглед ќе поверуваат во сè што ќе видат на интернет“, смета еден твитерџија.
„Ова само покажува колку е лесно да лажираш снимки од напад“, додава друг.
„Видеото многу ме вознемири, имам чувство како некои луѓе да сакаат ова навистина да се случи“, гласи друг коментар.