Украинскиот претседател Володимир Зеленскиј синоќа предложи средба со неговиот руски колега Владимир Путин, во време на растечки страв од руска инвазија врз Украина.
– Не знам што сака рускиот претседател, затоа предлагам да се сретнеме, рече Зеленскиј на Минхенската безбедносна конференција.
Тој додаде дека Украина е „штит на Европа“ против руската армија и го повика Западот да ја зголеми помошта.
– Ја цениме секоја помош, но сите мора да сфатат дека тоа не се добротворни придонеси што Украина треба да ги бара … Тоа е ваш придонес за безбедноста на Европа и светот. Каде што Украина е штит осум години, рече Зеленскиј.
Претседателот на Украина повика и на „јасен и остварлив“ календар за влез во НАТО.
– Соочен со Русија, Западот треба да ја поддржи Украина и нејзините одбранбени капацитети и да ѝ даде јасен и остварлив распоред за членство во НАТО, рече Зеленскиј.
