Јулија Навалнаја, вдовицата на рускиот опозициски лидер Алексеј Навални, денеска во видеопорака изјави дека ќе продолжи со работата на својот сопруг и ќе се бори за слободна Русија.
„Сакам да живеам во слободна Русија, сакам да изградам слободна Русија“, рече Навална во видео пораката со наслов: „Ќе ја продолжам работата на Алексеј Навални“.
„Владимир Путин го уби мојот сопруг“, додаде Навалнаја, нагласувајќи дека ќе работи со рускиот народ за да се бори против Кремљ и да создаде нова Русија.
Кремљ негираше вмешаност во неговата смрт. Навалнаја ги обвинува руските власти дека го кријат неговото тело и чекаат да исчезнат трагите од нервниот агенс новичок.
Сојузниците на Навални знаат зошто нејзиниот сопруг е убиен и наскоро ќе ги откријат деталите, вклучително и имињата на оние кои се вмешани во неговото убиство, рече таа.
Руските истражители сè уште не ја утврдиле причината за смртта на Алексеј Навални, ниту е јасно колку време ќе биде потребно за да се донесат официјални заклучоци, изјави денеска неговата мајка.
Навални, 47-годишен поранешен адвокат, колабирал и починал во петокот по прошетката во казнената колонија на „Поларни волци“ во Харпа, на околу 1.900 километри североисточно од Москва, каде што издржуваше 30-годишна казна, соопшти затворската служба.
На мајка му Људмила во затворот во саботата ѝ беше кажано дека тој починал од „синдром на ненадејна смрт“, недефиниран термин за различни фатални срцеви заболувања.
Портпаролката на Навални, Кира Јармиш, изјави дека на неговата 69-годишна мајка и на адвокатите им било кажано дека официјалната истрага за причините за смртта е продолжена и дека не се знае колку долго ќе трае.
Причината за смртта е неутврдена, рече Јармиш, додавајќи дека руските власти лажат и одолговлекуваат.
Неговата мајка и адвокатите не добиле дозвола да влезат во мртовечницата во арктичкиот град во близина на затворската колонија, каде властите велат дека Навални паднал и починал на лице место денеска, изјави портпаролката.
Вработените во мртовечницата не одговорија на прашањето дали телото на Алексеј е внатре, тврди Јармиш.
Со смртта на Навални поделената руска опозиција остана без нејзиниот најхаризматичен и најхрабар лидер, додека претседателот Владимир Путин се подготвува за избори со кои би можело да остане на власт најмалку до 2030 година.