Чилеанскиот фудбалер кој имаше одлична кариера во неколку европски клубови останува во Бразил, но во нов клуб.
Откако освојуваше трофеи и во Фламенгу, Артуро Видал сепак по само една година се рaздели со овој клуб од Рио де Жанеиро. Откако во април на „Маракана“ дојде аргентинскиот стратег Хорхе Сампаоли, Видал го загуби местото во првиот тим и ретко играше, а кога добиваше шанса играше епизодна улога.
„Во моментов сум 100% подготвен. Ако не играм повеќе, тоа не е мој проблем. Комплицирано е кога не играш. Нема никој подобар од мене на мојата позиција. Можам да правам работи што никој друг не може да ги направи. Моите деца се тука, па тоа ми дава сила да продолжам да се борам“, истакна тој пред неколку дена во врска со проблемот со новиот тренер.
Во родниот Чиле навивачите очекуваа да се врати во Коло-Коло, клубот каде ги направи првите чекори во професионалниот фудбал, но Видал сепак се одлучи да остане во Бразил.
Кариерата ќе ја продолжи во Атлечику Паранаенсе, клуб од Куритиба, за кого велат дека е најсилниот клуб надвор од Големата 12-ка во Бразил. До крајот на неделава треба да ги направи медицинските прегледи и да стави потпис на договорот. Тој на социјалните мрежи веќе се прости од популарниот Менгаун.
Чилеанецот во мај наполни 36 години, но и натаму е актуелен репрезентативец (140 настапи за Чиле, 33 голови). Пред да дојде во Фламенгу играше за Интер, каде освои Скудето, Копа Италија и Суперкупот. Со Фламенгу ја освои Копа Либертадорес, како и Купот на Бразил. Видал освојуваше трофеи и претходно со Барселона, Баерн, Јувентус и Коло-Коло, а единствено не успеа да освои пехар со Баерн Леверкузен. Со Чиле двапати ја освои Копа Америка.