Милиони средношколци во Виетнам се вратија во училишните клупи по три месеци отсуство. Во земјата 17 дена по ред не е забележан ниту еден случај на интерно пренесување на коронавирусот, пренесе AFP.
Пред да влезат во училница на децата им ја мерат температурата. Децата кои одат во основно училиште и во градинка ќе почекаат уште една недела.
Одлуката за враќање на учениците во клупите претходи на ублажувањето на мерките на физичко дистанцирање кон крајот на април. Наставата беше прекината кон крајот на јануари, а некои деца почнаа да се враќаат кон крајот на минатата недела.
Властите на сила ги оставија строгите мерки на физичко дистанцирање во училиштата, на учениците им е наредено да носат маски и во ниту еден момент да не приоѓаат едни кон други на близина од 1,5 метри.
Досега во Виетнам беа потврдени 271 позитивни на коронавирус, од нив 219 се закрепнати додека 52 се активни случаи. Нема починати од COVID-19.
Извршени се вкупно 261.004 тестирања.