Во првите шест месеци од годинава сечата на шума во бразилската амазонска прашума достигна рекордно високо ниво, односно уништена е површина петпати поголема од Њујорк, покажуваат податоците на бразилската Влада.
Според бразилската Агенција за вселенски истражувања Инпе, од јануари до јуни оваа година во Амазон се исечени дрвја на 3.988 квадратни километри, што е зголемување за 10,6% во споредба со истиот период лани.
Само во јуни уништувањето на шумите се зголемило за 5,5%, односно биле уништени дрвја на 1.120 квадратни километри, што е исто така рекорд за тој месец.
Најголемата прашума во светот, Амазонија, содржи огромни количини на јаглерод, што се ослободува со уништување на дрвјата, Тоа резултира со загревање на атмосферата и поттикнување климатски промени.
Уништување на шумата е поттикнато и од невообичаено големите пожари во Амазонија, а се очекуваат пожари и во следните месеци. Во Бразил во јуни се регистрирани најголем број пожари во изминатите 15 години.
Експертите во Бразил го обвинуваат десничарскиот претседател Жаир Болсонару за намалувањето на заштитата на животната средина и охрабрувањето на дрвосечачите, сточарите и шпекулантите кои го чистат јавното земјиште заради профит.
