Во Бугарија пропадна третиот и последен обид за формирање нова влада по падот на владата на премиерот Кирил Петков.
Лидерот на пратеничката група на Социјалистичката партија, Георги Свиленски, во средата во Софија изјави дека нема да може да формира влада, откако пропаднаа обидите да се добие парламентарно мнозинство со старите коалициски партнери.
Претседателот Румен Радев пред 10 дена им даде мандат на социјалистите да формираат влада. Според уставот, претседателот сега мора да го распушти парламентот и да распише нови избори, кои најверојатно ќе бидат во октомври.
Тоа би биле четврти парламентарни избори во најсиромашната земја на ЕУ од април 2021 година.
Четирипартиската влада на Петков, во која имаше и социјалисти, беше на власт од декември 2021 година. Во јуни, таа го загуби парламентарното мнозинство бидејќи популистичката партија Има таков народ (ИТН) ја напушти коалицијата.
Со гласањето недоверба на парламентот на 22 јуни беше соборен кабинетот на Петков.
Партијата на Петков Продолжуваме со промени (ПП) вети „нулта толеранција за корупција“, и реформи.
Петков ќе продолжи да ја води владата сè додека претседателот Радев не ја именува привремената влада.
