Наскоро светот треба да добие нов шампион кога е во прашање височината бидејќи Египќаните ќе градат облакодер висок илјада метри.
Наречен Oblisco Capitale, со височина од 1.000 метри, треба да биде новата највисока градба на светот, повисока од Бурџ Халифа во Дубаи.
Облакодерот треба да почне да се гради во 2024 година и тоа во новопроектираниот град кој треба да биде административна престолнина на Египет. Зградата има облик на египетски обелиск, оттаму и името, а дизајнирана е од домашната архитектонска фирма IDIA со седиште во Гиза.
Новиот град веќе се гради од 2015 година, а сѐ уште нема име и според проектот се нарекува едноставно Нова Административна Престолнина. Покрај најголемата зграда на светот ќе ја содржи и најголемата катедрала во Египет и Блискиот Исток наречена Христово Раѓање, како и најголемата џамија во Египет, Ал-Фатах Ал-Алим. Двете се веќе изградени и отворени за јавноста.