Никој не може да ве спречи да го користите тоалетот среде ноќ. Меѓутоа, по обавување на физиолошката потреба немојте да пуштате вода. Тоа е случај доколку живеете во изнајмен стан со тенки ѕидови, верувале или не, во Швајцарија.
Во повеќето правилници за станари во станбените згради во Швајцарија е наведено дека треба да се почитува куќниот ред и дека соседите не смее да се вознемируваат во периодот од 22 часот вечерта до 7 часот утрината.
Куќниот ред зависи од зграда до зграда, листата на забранети активности варира во зависност од дебелината на ѕидовите во објектот, бројот на станови и профилот на станарите.
На листата на забранети активности може да се најдат и многубројни гласни активности - на пример градежни работи, забави, свирење инструмент или користење правосмукалка. А, доколку живеете во зграда со тенки ѕидови, на овој список може да стои и пуштање вода во тоалет.
На интернет кружат приказни дека правилото за забрана за пуштање вода во тоалетот по 22 часот е урбан мит кој нема врска со реалноста, а особено доколку живеете во стан со повеќе луѓе.
„Кога живеете во стан со повеќе луѓе, морате да пуштите вода во тоалетот, во спротивно толку смрди што дури и мувите почнуваат да кашлаат“, се нашали една швајцарска корисничка на Quora, сервисот за поставување прашања.
„Во мојата зграда не е дозволено да се слуша музика по 21 часот, да се разговара на телефон освен во итни ситуации, да се прави било каква галама, куче да лае гласно, да работи машина за перње алишта и слично. Но, да се пушта вода во тоалетот е нужност“, додаде.
Листата на забранети активности во станбените згради обично е наведена во договорите за изнајмување стан, а станарите се должни да ги потпишат и да се согласат со нив пред да се вселат. На тој начин никој не се присилува да прави нешто со што претходно не бил запознаен.
Како најдобро да се објасни ситуацијата со пуштањето вода во тоалет во ноќните часови во Швајцарија? Не е противзаконски да се пушта вода во тоалет, но исто така не е противзаконски агенцијата за издавање станови во име на сопственикот на зградата да стави такво ограничување во договорот за изнајмување и казни за станарите кои не се придржуваат до правилото, особено во старите згради.
