Во Израел, земја која и покрај високиот процент на вакцинирани се бори со четвртиот бран на коронавирусот, вчера за првпат од јануари беа регистрирани повеќе од 10.000 заразени во последните 24 часа.
Министерството за здравство доцна вечерта објави дека за 24 часа се забележани 10.001 нов случај на зараза со коронавирусот. Тешко болни се 688, а 25 луѓе починале.
Израел кампањата за вакцинација ја започна минатата година. Со две дози се вакцинирани 59% од 9.4 милиони жители, а со трета доза 19%. Вакцинацијата се врши исклучиво со Pfizer.
Израел е првата земја која почна со трета доза на вакцинација со цел да го засили имунитетот на жителите.
Одлуката е донесена откако научни студии покажаа дека со текот на времето опаѓа ефикасноста на вакцините во спречување на заразата, иако и понатаму нудат силна заштита од тежок облик на болеста.
Во последните неколку недели во Израел се шири агресивната делта варијанта на коронавирусот.
