Во првите две недели од животот бебињата плачат околу два часа дневно. По шест недели плачењето го достигнува врвот и трае околу 2 часа и 15 минути дневно, додека до 12 недела се намалува во просек на еден час и 10 минути дневно.
Но, утврдено е дека некои бебиња плачат само 30 минути дневно, а други и повеќе од 5 часа во еден ден. Најмногу плачат бебињата родени во Обединетото Кралство, Италија, Канада и Холандија, а најмалку оние родени во Данска, Германија и Јапонија, покажа истражување на Универзитетот Ворвик.
Професорот Дитер Волке од Одделот за психологија на споменатиот универзитет формулираше универзални таблици кои ја прикажуваат нормалната количина на плач кај бебињата во текот на првите три месеци од животот.
Во мета анализата која вклучува 8700 доенчиња од Германија, Данска, Јапонија, Канада, Италија, Холандија и Обединетото Кралство, професорот пресметал колку долго бебињата плачат во 24 часа во различни култури во првите 12 недели.
Највисоко ниво на грчеви или колики, кои се главна причина за плачење кај бебињата, е откриено меѓу оние родени во Велика Британија, Канада и Италија, а најмалку во Данска и во Германија.
„Бебињата многу се разликуваат по тоа колку плачат во првите недели од животот. Постојат големи варијации. Можеби повеќе ќе научиме ако поблиску ги истражиме културите во кои бебињата помалку плачат. Не знаеме дали е тоа последица од родителство или други фактори кои се однесуваат на искуството на бременоста или генетиката“, вели професор Волке откако резултатите од истражувањето се објавени во списанието The Journal of Pediatrics.