Откако косовската полиција утринава упадна во Северна Митровица и Звечан поради акција поврзана со криумчарени лекови, во овие места избија нереди и конфликт меѓу граѓаните и полицијата. Потврдено е дека едно лице е тешко рането.
Според информациите на порталот Косово онлајн, еден Србин е ранет во Звечан и е во тешка состојба.
„Повредата е нанесена со огнено оружје, лицето е застрелано во пределот на градниот кош. Повредени се ребрата, се подготвуваме за операција за да го извадиме куршумот. Лицето е на интензивна нега и е во тешка состојба“, изјави хирургот Златан Елек, директор на КБЦ Косовска Митровица.
Овој портал наведува дека во лицето е пукано од зад грб. Во болницата се примени уште шестмина повредени, косовската полиција уапси еден Србин, а во Звечан граѓаните поставуваат барикади.
И Владата на Србија потврди дека десетмина се повредени на Косово, а ранетиот Србин се бори за живот.
Конфликтот настана откако полицијата упадна во аптека, но претходно фрли шок бомби.