Volkswagen се подготвува да произведе електричен автомобил од почетно ниво, кој би бил позициониран под електричниот модел ID.2 со големина на Polo, откри шефот за технички развој на германскиот гигант, Каи Груниц.
Груниц рече дека Volkswagen „навистина работи на моделот ID.1 или мал ID или како и да се викаше“, и додаде дека „многу е важно да се има мало возило со поволна цена“.
Досега електричните автомобили се покажаа како значително поскапи од нивните еквиваленти на мотори со внатрешно согорување, а бидејќи батериите го сочинуваат најголемиот дел од таа разлика во цената, потребно е намалување на цената на самата батерија за да се одржат цените пониски. Груниц е убеден дека Volkswagen е блиску до остварување на таа цел.
„Со нашата унифицвирана ќелија која доаѓа во 2026 година, ние навистина ќе ја намалиме цената на самата батерија“, рече тој.
Сепак, се поставува прашањето дали Volkswagen Group може да го повтори успехот на моделите Up/Mii/Citigo и да го развие самиот автомобил или ќе побара помош од „надвор“.
„Од технолошка перспектива, мислам дека можеме да го направиме тоа. На крајот, тоа е прашање на приспособливост, но тешко е да се добие навистина прифатливо целосно електрично возило“, рече Груниц.
„Бараме партнери за соработка надвор од VW Group, ќе видиме што ќе се случи. Автомобилот мора да биде профитабилен, но за VW овој модел е многу поважен од самиот профит бидејќи претставува влез во нашиот бренд. Првиот автомобил мора да биде достапен за клиентот, бидејќи ако седне во ID.1, можеби малку подоцна неговиот следен автомобил ќе биде ID.2, ID.3 или ID.4. Затоа е навистина важно да имате мало поволно возило“, изјави тој.
Сепак, овој модел нема да ја користи скалабилната SSP платформа која најверојатно ќе пристигне во 2028 година како основа за сите модели, од Polo до Bentley Bentayga.
„Овој автомобил нема да биде дел од семејството SSP, бидејќи оваа платформа пристигнува малку подоцна. Затоа, ќе користи друга платформа“, заклучува Груниц.
Дали ќе биде адаптација на постоечката MEB платформа останува да видиме, но потврдено е дека Volkswagen разгледува различни можности.