Вооружени банди упаднаа во затвор во главниот град на Хаити и ослободија голем број затвореници. Повеќето од околу 4.000 мажи кои беа затворени во Порт-о-Пренс избегаа, изјави локален новинар за BBC.
Меѓу затворениците имало и членови на бандата обвинети за убиство на претседателот Жовенел Моиз во 2021 година.
Прогласена е 72-часовна вонредна состојба, а владата најави дека ќе лови убијци, киднапери и други насилни криминалци за кои верува дека избегале.
„На полицијата ѝ е наредено да ги искористи сите средства што ѝ се на располагање за да го спроведе полицискиот час и да ги уапси сите прекршители“, рече министерот за финансии Мишел Патрик Боавер, кој ја извршува функцијата премиер.
Насилството во Хаити, најсиромашната земја на американскиот континент, ескалира во последниве години. Бандите кои сакаат да го соборат привремениот претседател Ариел Анри контролираат 80% од престолнината Порт-о-Пренс.
Последниот бран на насилство почна во четвртокот, кога претседателот отпатува за Најроби за да разговара за испраќање во Хаити меѓународни безбедносни сили предводени од Кенија.
Водачот на бандата, Џими Шеризје, започна координиран напад за да го елиминира Анри. Тој рече дека целта на нападот била да се фати шефот на полицијата и министрите на владата на Хаити и да се спречи враќањето на Анри.
„Сите ние, вооружените групи во провинциските градови и вооружените групи во главниот град, сме обединети“, изјави поранешен полицаец за кој се верува дека стои зад неколку масакри во Порт-о-Пренс.
Во бранот престрелки загинаа четворица полицајци, а петмина беа повредени. Француската амбасада во Хаити советуваше да не се патува во и околу главниот град.
Полицискиот синдикат на Хаити побара помош од војската за зајакнување на затворите, но нивниот штаб беше нападнат доцна навечер во саботата.
Во неделата вратите на затворот беа сè уште отворени и немаше полицајци, објави новинската агенција Reuters. Тројца затвореници кои се обиделе да побегнат лежеле мртви во дворот, се вели во извештајот.
Арнел Реми, адвокат за човекови права чија непрофитна организација работи во затворот, на X објави дека помалку од 100 затвореници остануваат зад решетки.
„Јас бев единствениот кој остана во ќелијата“, изјави за Reuters еден неидентификуван затвореник.
Во затворот, изграден за 700 затвореници, до февруари минатата година се сместени 3.687 од нив, објави организацијата за човекови права РНДДХ.
Од атентатот на претседателот Моиз, насилството е во пораст. Неговиот наследник сѐ уште не е избран, а избори не се одржани од 2016 година.
Според политичкиот договор, требаше да се одржат избори, а Анри, кој не беше избран, требаше да се повлече до 7 февруари, но тоа не се случи.
ОН во јануари соопштија дека повеќе од 8.400 луѓе биле жртви на групно насилство на Хаити минатата година, вклучувајќи убиства, повреди и киднапирања – двојно повеќе од бројот регистриран во 2022 година.
Многу жители останаа без интернет бидејќи, како што соопштија од најголемиот телеком на Хаити, за време на немирите бил пресечен оптички кабел. Проблемот е решен вчера попладне.
За неполни две недели, неколку државни институции беа нападнати од банди кои сè повеќе ги координираат нивните акции и избираат некогаш незамисливи цели, како што е Централната банка.
Полициските сили на Хаити имаат околу 9.000 полицајци кои се грижат за безбедноста на повеќе од 11 милиони луѓе, според бројките на ОН.