За разлика од првиот натпревар од финалето на НБА, Голден Стејт Вориорс во вториот знаеше како да ја одржи предноста стекната во третата четвртина.
Со 29 поени од Стеф Кари, тие ги победија Селтикс со 107:88 и изедначија во финалната серија на 1-1 пред да се преселат во Бостон за следните два. Третиот натпревар се игра во среда навечер.
Како и многу пати од собирањето на оваа генерација, Вориорс експлодираа во третата четвртина. Имаа само два дополнителни поена на полувремето, но потоа се „распукаа“ Кари и Џордан Пул, кој имаше само три поени на полувремето и заврши со 17, погодувајќи и тројка од центарот со сирена за крајот на третиот период и огромни 23 поени разлика. Со 22 години, тој стана најмладиот играч со најмалку пет тројки во финалето на НБА.
Во првиот натпревар Селтикс освоија +24 во последната четвртина, но овојпат немаа сили за спектакуларен камбек. И едните, и другите погодија 15 тројки од 37 обиди, но Вориорс беа поубедливи во линијата за три поени, ограничувајќи ја нивната најголема болка - губењето на топката - на 12 во споредба со 18 за Селтикс.
Домаќините преживеаја и многу лошо издание на Клеј Томпсон (11 поени, 4/19 шутеви), но Дрејмонд Грин овојпат беше поагресивен со топката и барем изнуди слободни фрлања, наместо да биде човек помалку во нападот отколку во првиот натпревар.
Откако во 2014 година беа преземени од Стив Кер, Вориорс не изгубиле со 2-0 во плеј-офот, па овојпат избегнаа ваква ситуација. Гледајќи низ историјата, третиот натпревар ќе биде клучен. Досега титулата ја освоиле 82,1% од тимовите кои победиле во третиот натпревар по 1:1.
