Автомобил кој во раните 80-ти беше 20 години пред своето време, наскоро би можел да ја добие својата модерна електрична верзија.
Уште една од рекламите што можевме да ги видиме за време на овогодинешниот Супербоул, а која привлече внимание, беше онаа за новиот DeLorean, легендарниот автомобил што ги одбележа 80-тите и франшизата „Back to the Future“.
DeLorean Motor Cars (DMC) е компанија од Северна Ирска која на почетокот од 80-тите години на минатиот век претстави легендарен автомобил наменет за северноамериканскиот пазар. Она што го истакна овој автомобил е фактот дека за дизајнот е заслужен легендарниот италијански дизајнер Џорџето Џуџаро, со препознатливи врати кои се отвораат нагоре (како крилја на галеб).
Иако DeLorean беше произведен во само 9.000 примероци, перформансите на автомобилот не одговараа на неговиот исклучителен дизајн, па производството беше прекинато по само година дена. Овој двосед, иако страдаше од неквалитетна изработка и тромост на патот, доживеа планетарен успех откако се појави во серијалот филмови „Back to the Future“.
По неуспешната продажба компанијата DeLorean банкротираше, а потоа беше откупена од новата DeLorean Motor Company од Тексас, заедно со сите трговски марки, интелектуалната сопственост и преостанатите делови за автомобили. Новите сопственици дошле на идеја да му вдахнат нов живот на овој автомобил, кој одбележа една ера. Иако планот на почетокот бил да се оживеат старите автомобили со комбинација на оригинални и нови делови, се чини дека овие идеи се отфрлени и дека новиот автомобил е навистина нов.
Рекламата за време на Супербоулот не открива многу, освен препознатливите контури кои се добро познати веќе 40 години, па очекуваме наскоро да се појават нови детали кои ќе откријат нешто ново за овој автомобил.
Под мотото „The Future was never promised“, компанијата која стои зад новиот автомобил на својот Twitter профил сподели дека оваа година може да се очекува нов автомобил, како и дека се работи за луксузно електрично возило.
