Српскиот претседател Александар Вучиќ е еден од учесниците на 59-тата Минхенска безбедносна конференција, од каде ѝ се обрати на јавноста во својата земја.
Темата, погодувате, беше Косово. Српскиот претседател рече дека уште една земја одлучила да го повлече признавањето на независноста на Косово.
Тој ја искористи конференцијата во Минхен за да се сретне со францускиот претседател Емануел Макрон и со германскиот канцелар Олаф Шолц.
„Разговорите беа добри, но ништо епохално не може да се случи. Имајќи го предвид сето тоа, добро е што дојдовме да го објасниме нашиот став. Бевме пречекани со почит. Имаме уште една нота за повлекување на признавањето, но во договор со таа земја ќе чекаме 23 или 24 февруари за да кажеме за која земја станува збор“, рече Вучиќ.
„Јас дојдов да зборувам за Заедницата на српски општини. Не можете да потпишете нешто пред 10 години, а потоа да кажете дека Вучиќ сака шолја кафе, но без шолја. Мора да го исполните тоа што сте го потпишале, а потоа можеме разговараме понатаму“, додаде тој.
Српскиот претседател уште еднаш ја подвлече тешката ситуација во која се најде Србија кога е во прашање Косово.
„Американците беа меѓу ретките кои сакаа да ги слушнат забелешките на Србите кога имаше барикади на Косово. Воопшто не им верувам на властите во Приштина“, рече Вучиќ.
Српскиот претседател денеска во Минхен се сретна и со македонскиот премиер Димитар Ковачевски.
