Високиот претставник на ЕУ за надворешна и безбедносна политика ги покани српскиот претседател Александар Вучиќ и косовскиот премиер Албин Курти на итен кризен состанок денеска во Брисел, додека Вучиќ рече дека доаѓа во Брисел, но дека не сака да се сретне со Курти.
„Ги поканив лидерите на Србија и Косово на итен состанок со цел да се најде излез од актуелната криза. Мора веднаш да ја деескалираме ситуацијата, да одржиме нови избори на северот на Косово со учество на косовските Срби. Ова е од најголема важност за регионот и ЕУ“, напиша Борел на Twitter.
Српскиот претседател Александар Вучиќ утрово најави дека ќе дојде во Брисел и ќе разговара со Борел, но дека нема што да разговара со Курти. „Ќе одам во Брисел да разговарам еден час, два, десет, со Борел, но немам што да разговарам со Курти“, изјави Вучиќ за РТС.
Ситуацијата на северот на Косово е крајно напната во последните неколку недели. Кон крајот на мај, локалните Срби се спротивставија на преземањето на функцијата градоначалници од етничките Албанци по локалните избори во четири северни општини каде излезноста беше само 3,4 отсто, бидејќи Србите, кои го сочинуваат мнозинството на север, ги бојкотираа.
Во судирите беа повредени 30 припадници на мировните сили (КФОР) и повеќе од 50 српски демонстранти. Последниот инцидент се случи кога српските сили уапсија тројца косовски полицајци. Србија тврди дека тие биле уапсени длабоко во нејзината територија, додека Приштина вели дека биле уапсени на 300 метри на територијата на Косово.