Претседателот на Србија, Александар Вучиќ, за време на синоќешното гостување на државната телевизија, зборуваше за повеќе актуелни прашања, меѓу кои беше и ситуацијата на Косово, но и настани во светот за кои нема светла прогноза.
Водителот на почетокот го привлече вниманието на критиките кон претседателот на Србија и го праша зошто сè уште го обвинуваат.
„Имаше поинтересни обвинувања од диктатура, автократија и авторитаризам, тоа е дел од секојдневието на политичкиот живот. Видовте дивеење на неколку пратенички групи, неколку напади врз мене и врз претседателот на собранието, а никој не беше исклучен од таа седница“, изјави Вучиќ.
Српскиот претседател продолжи да зборува за ситуацијата на Косово и настаните во таа земја кои се случија по 2000 година.
„Ни претстои најголемата криза во светот што ја видовме од Втората светска војна. Ова беше речиси ништо, во споредба со она што ни следи. Ни претстои голема ескалација. Се надевам дека луѓето ќе сфатат дека ова никому не му треба и дека ќе се трудат да ја деескалираат ситуацијата. Во следните 5-6 месеци следуваат најголемите конфликти досега. Притисоците ќе бидат неспоредливо посилни во однос на Руската Федерација, ќе има силни притисоци околу Косово“, додава Вучиќ.
Тој додаде дека е многу тешко, речиси невозможно да се „победи западното единство“ кога станува збор за војната во Украина и додаде дека единството на Русите се буди дури сега, откако украинската армија доби значителна помош во форма на тенкови Leopard.
