Русија попладнево го прошири списокот лица на кои им е забранет влез во земјата како одговор на санкциите воведени од Западот.
На листата на лица на кои им е забранет влез во Русија сега се најдоа и потпретседателката на САД, Камала Харис, основачот на Facebook Марк Закерберг, како и портпаролот на Пентагон, Џон Кирби.
На ажурираната листа се додадени вкупно 29 американски функционери и новинари.
„На овие лица им е забранет влезот во Руската Федерација на неодредено време“, соопшти руското Министерство за надворешни работи.
Минатиот месец забрана за влез во Русија му беше изречена и на американскиот претседател Џо Бајден.
Бајден не ја има посетено Русија од 2011 година, кога му беше потпретседател на Барак Обама. Неговото патување во Москва вклучуваше разговори со рускиот претседател Владимир Путин.
Во март забрани за влез во Русија им беа изрешени и на државниот секретар Ентони Блинкен, шефот на ЦИА Вилијам Барнс, секретарот за одбрана Лојд Остин и советникот за национална безбедност Џејк Саливен.
