Католичката црква во Франција ќе ги обештети луѓето кои биле жртви на сексуална злоупотреба на свештеници, а сумата на пари се движи од 5.000 до 60.000 евра, пишува Le Parisien.
Независната комисија за признавање и компензација (CRR), формирана на барање на Католичката црква за да посредува меѓу жртвите и црквите каде што имало злоупотреби, разви рамка во која има одредени соодветни парични надоместоци за различни видови прекршоци и кривични дела.
Надоместокот ќе го плаќаат црквите
За плаќање на отштетата ќе бидат задолжени самите цркви. Според студијата објавена во октомври, од 50-тите, Католичката црква во Франција е одговорна за сексуалната злоупотреба на околу 216.000 деца и адолесценти.
Ако на тоа се додадат и жртвите на злоупотреба во институциите под контрола на црквата, бројот на жртви на сексуална злоупотреба се искачува на 330.000. Но, многу малку жртви се обратиле до црквата или до властите. Во Германија, во 2021 година, Католичката црква најави исплата на отштета за жртвите на злоупотреба во износ до 50.000 евра. Досега реализираните обештетувања во просек изнесуваат околу 5.000 евра.
