Дивок Ориги (26), напаѓачот на Ливерпул и на белгиската репрезентација, на крајот на сезоната, по осум години го напушта Ливерпул и без отштета се сели во Милано.
Ова го пишуваат италијанските медиуми кои нагласуваат дека „Росонерите“ и Ориги се договориле за сè. Што е најважно, Белгиецот потпишува на три години за 3,5 милиони евра по сезона.
Ориги стана познат во Ливерпул како џокер кој одлично ги користи можностите од клупа или оние ретките како првотимец, а незаборавни се неговите два гола за победа од 4:0 над Барселона во реваншот од полуфиналето на Лигата на шампионите во 2019 година.
На 171 настап за „Црвените“, тој постигна 40 и намести 17 голови. Сезонава одигра само 533 минути на 14 натпревари, но и со толку скромни минути успеа да постигне пет гола и да асистира за три.
Тој во Ливерпул дојде во 2014 година од Лил со обештетување од 12,6 милиони евра, но оттогаш мина по една сезона на позајмица во Лил и Волфсбург. Transfermarkt го проценува на 12 милиони евра.
За Белгија, Ориги одигра 32 натпревара и постигна 3 гола. Селекторот Роберто Мартинес го врати во националниот тим на крајот на минатата година откако Ориги една година не играше за Белгија.
