Од денеска, 1 април 2021 година, Volvo Cars ќе обезбеди платено родителско отсуство на сите 40.000 вработени во компанијата.
Новата политика Family Bond ќе им овозможи на сите вработени, без оглед на полот, кои имаат минимум една година стаж, да добијат 24 недели родителско отсуство. Во овој период ќе добиваат 80 проценти од платата. Правилата важат и за двајцата родители и отсуството може да се земе во кое било време во првите три години од раѓањето на детето.
„Сакаме да создадеме култура што поддржува еднакво родителство за сите родови“, рече извршниот директор Хакан Самуелсон.
„Кога родителите имаат поддршка за да ги балансираат деловните и семејните одговорности, тоа помага да се намали родовиот јаз и им овозможува на сите да се истакнат во својата кариера. Отсекогаш сме биле семејно ориентирана компанија. Преку програмата Family Bond, ги демонстрираме и живееме нашите вредности, што пак ќе го зајакне нашиот бренд“, додаде тој.
Некои земји не нудат платено отсуство за новите родители или ги исклучуваат татковците. Политиката на компанијата Volvo Cars е инспирирана од националното законодавство на нејзиниот домашен пазар во Шведска, познато ширум светот по великодушните можности за нови родители.
„Сакаме да донесеме промена во оваа индустрија и да поставиме нов глобален стандард за луѓето. Одлучувајќи дека сите наши вработени имаат право на платено родителско отсуство, го намалуваме родовиот јаз и добиваме поразновидна работна сила, зголемувајќи ги перформансите и зајакнувајќи го нашиот бизнис“, рече Хана Фагер, раководител на Одделот за корпоративни работи.
Овој потег, исто така, ќе го зголеми бројот на жени менаџери во компанијата, смета Самуелсон, делумно со тоа што ќе се отстрани стигмата за правење подолги прекини во кариерата.
„Не сакаме жените да бидат надминати од машките колеги додека се на породилно отсуство“, вели тој.
Во моментов, третина од високото раководство на Volvo се жени, а компанијата има за цел да го зголеми ова на 50 проценти.
„На долг рок, нашиот бренд ќе биде посилен, бидејќи имаме подобро, поразновидно раководство за да донесуваме правилни одлуки“, додаде Самуелсон.
За понатамошна демонстрација на заложбата за намалување на родовиот јаз, Volvo Cars ќе ги сподели своите резултати од програмата за другите компании да научат од неговиот напредок.
