8 декември 1980 – убиен бил Џон Ленон

На денешен ден, 8 декември, во 1980 година убиен бил Џон Ленон, пејач, композитор и гитарист на Битлс.

Роден е на 9 октомври 1940 година.

Неговата креативна кариера содржи и епизоди во кои Ленон може да се опише како политички активист, уметник, глумец и писател. Дел е од тимот Ленон-Мекартни, можеби најуспешното кантавторско дуо во историјата на рок-музиката. Истовремено, во својата соло-кариера, Ленон останува запамтен и како автор на Imagine и Give Peace A Chance, две од најпознатите песни на дваесеттиот век. Тој е една од големите музички икони на дваесеттиот век.

Се ожени со Јапонката Јоко Оно на 20 март 1969 година.

На 8 декември 1980 година Ленон  беше застрелан од негов психички пореметен обожавател, Марк Дејвид Чепмен, во Њујорк.

Во 2002 година, според анкетата 100 најголеми Британци на BBC, Ленон бил рангиран на осмото место. Во 2004 година, списанието Rolling Stone го прогласи Ленон за 38. најголем музичар на сите времиња на својата листа „Бесмртните: Педесетте најголеми уметници на нашата епоха“. На истата листа, Битлс го зазедоа првото место.

Во 1969 година, заедно со другите членови на Битлс, Ленон го доби Орденот на Британската Империја, но четири години подоцна го врати орденот, наведувајќи неколку причини: вмешаноста на Британија во војната во Нигерија, поддршката што Британија ѝ ја давла на САД во војната во Виетнам и лошиот комерцијален успех на неговата песна Cold Turkey.