Напаѓачот ветеран смета дека повеќе не може да придонесе во дресот со националниот бои и поради тоа е на став дека е фер местото да им го отстапи на оние кои се во моментов поспремни.
Во пресрет на објавувањето на списокот со повикани играчи за претстојните два последни натпревари од Лигата на нации против Грузија и Бугарија, што селекторот Благоја Милевски го закажа за утре од 11 часот, Адис Јаховиќ испратил допис до ФФМ во кој ја објаснува својата одлука.
Во дописот на Адис се вели:
„Да настапуваш во дресот на македонската репрезентација е исполнување на детскиот сон. Токму затоа воопшто не е лесно да се каже збогум, но сега е време за тоа. Не само заради мене, туку и поради репрезентацијата, соиграчите и селекторот. Чувствувам дека повеќе не сум во можност на вистински начин да одговорам на репрезентативните обврски и сега е време чесно да го соопштам тоа. Би сакал да се заблагодарам на сите соиграчи од репрезентацијата и целиот стручен штаб. Благодарност за селекторот Благоја Милевски за соработката и целата поддршка. Минавме и тешки и радосни моменти. Спомените ќе ги чувам засекогаш. Во оваа репрезентација има талент и квалитет. Убеден сум дека ќе продолжат да напредуваат и да ја радуваат македонската спортска јавност. Оваа генерација на македонски фудбалери зад себе веќе има големи резултати и сѐ што треба е да продолжат да даваат сѐ од себе на секој натпревар за Македонија. Во победа или пораз, навивачите тоа го ценат. Јас секогаш ќе бидам поддршка за тимот и цела репрезентација. Напред Македонија“.
Со оглед на тоа што Јаховиќ годинава наполни 35 години, не е изненадување неговата одлука. Тој е сениорски репрезентативец од ноември 2012 година кога дебитираше на пријателска против Словенија и воедно тогаш го постигна и првиот гол (има вкупно 3). Македонија на тој натпревар победи со 3:2. Настапи на само 19 натпревари, но речиси 4 години не беше во репрезентацијата поради кавга со поранешниот селектор Игор Ангеловски. Се врати во тимот веднаш отако Милевски беше назначен за селектор.
Од летото 2016 година со успех настапува во Турција каде го носеше дресот на Ѓозтепе, Конјаспор, Јени Малатјаспор, Анталјаспор, а денес ги брани боите на Бодрумспор. Претходно играше за руска Самара, хрватска Ријека, украинска Ворскла, швајцарските Вил и Цирих, босанските Сарајево, Жељезничар и Вележ, а во домашната лига настапуваше за Влазними и за Македонија ЃП каде и ја почна кариерата.