Apple објави дека генерирал 119,6 милијарди долари во продажба и 33,92 милијарди долари профит во првиот квартал од својата фискална година, надминувајќи ги очекувањата на аналитичарите, но цената на акциите сепак паднала, бидејќи инвеститорите биле разочарани од приходите од продажба на кинескиот пазар на паметни телефони, глобално најконкурентните, каде што се соочува со конкуренција од Huawei.
Продажбата на Apple се зголеми во последниот квартал од минатата година за 2% во однос на истиот период претходната година, со што компанијата го запре падот на продажбата по четири квартали, благодарение на продажбата на iPhone 15. Истовремено, профитот се зголеми за 13%.
Приходите од продажбата на iPhone во тој период достигнаа 69,7 милијарди долари, или 6% повеќе во однос на истиот период претходната година, а тоа е повеќе од очекувањата на аналитичарите кои предвидуваа продажба од 67,82 милијарди долари. Сепак, на кинескиот пазар, продажбата на тој најпрепознатлив производ на Apple достигна 20,82 милијарди долари, што е речиси 3 милијарди под очекувањата на аналитичарите.
„Задоволни сме со растот на приходите на iPhone од 6%. Особено силен, двоцифрен раст на продажбата беше на пазарите во развој, со исклучок на Кина, и на тие пазари iPhone работи добро. Кина е најконкурентниот пазар на паметни телефони во светот и тоа не се промени“, изјави извршниот директор на Apple Тим Кук во интервју за Reuters.
Цената на акцијата на Apple падна за 1,2% по објавувањето на деловните резултати. Во јануари Microsoft го засени Apple како највредна компанија во светот, додека инвеститорите веруваат дека Apple заостанува во трката за употреба на вештачка интелигенција во споредба со другите технолошки гиганти од Волстрит.
Акциите на Apple паднаа за повеќе од 3% од почетокот на 2024 година, во споредба со 2% добивка за С&П 500. „Каунтерпоинт Рисрч“ објави дека испораките на iPhone во Кина паднале во текот на кварталот, бидејќи кинеските потрошувачи барале нови телефони и мобилни телефони на склопување од Huawei, кој повторно го освои пазарот со водечки телефон напојуван со чип од домашно производство.
Apple исто така објави дека има 2,2 милијарди активни уреди ширум светот, што е за 200 милиони повеќе отколку на крајот на 2022 година.