Скандалот со нелегалното обложување ги полни насловните страници во италијанските медиуми.
Фудбалерите Николò Фаџоли, Сандро Тонали и Николо Заниоло паднаа први во истагата на обвинителството. Засега сигурно е дека играчот од средниот ред на Јувентус Фаџоли ќе добие седуммесечна суспензија, а завчера пред судот ја кажа својата верзија на приказната. Медиумите шпекулираат дека Тонали ќе биде суспендиран 16 месеци и дека на терените ќе се врати дури во 2025 година.
Проблемите за Јувентус би можеле да станат уште поголеми бидејќи „кралот на папараците“, Фабрицио Корона, објави дека во скандалот е вмешан и тренерот Масимилијано Алегри.
Наводно Алегри се обложил на натпревари од Серија Б преку пријател кој платил билети во негово име. Алегри беше фатен и во казино во Монте Карло за време на пандемијата на коронавирус.
„Тој постојано се коцкал. Еднаш добил 30 илјади евра, а лицето до него му дал 3.000 евра, велејќи дека е за ливчето за обложување. Неговиот пријател го уплатил ливчето за него. Од казиното се обложувал на натпревари од Серија Б“, рекол информаторот на Корона.
Коцкањето во казино не е спорно за Италијанците, но обложувањето на натпревари е проблематично. Да потсетиме, Фаџоли неодамна призна дека се обложил на фудбалски натпревари.
На спортистите во Италија им е забрането да се обложуваат на натпревари организирани од Италијанската фудбалска асоцијација, УЕФА и ФИФА и им е забрането да ставаат облози директно или индиректно.
Сандро Тонали (23) и Николо Заниоло (24), италијански репрезентативци и играчи на англиските клубови Њукасл и Астон Вила, се во центарот на аферата заедно со Фаџоли.
