Фудбалерите на Интер синоќа го победија Јувентус во 23. коло од Серија А со 1:0 и направија огромен чекор кон освојување на Скудетото, а тренерот на „Старата дама“, Масимилиано Алегри, го обвини својот напаѓач Душан Влаховиќ за поразот.
Во 32. минута, при 0:0, по контранапад Вестон МекКени одлично му сервираше на Влаховиќ, кој се најде пред голманот Јан Зомер и можеше да избере каде ќе шутира.
Сепак, Србинот катастрофално ја прими топката, што Бенжаман Павар го искористи за да го блокира неговиот удар.
Само пет минути подоцна Федерико Гати си постигна автогол, кој беше единствениот гол на натпреварот.
Алегри по натпреварот изјави дека се можело да биде поинаку доколку Влаховиќ го искористел зицерот и го довел Јувентус во водство.
„Во првото полувреме бевме изедначени, но тие постигнаа гол, а Влаховиќ промаши зицер“, изјави Алегри по поразот.
Влаховиќ сезонава во Серија А постигна 12 гола на 21 натпревар, со што е втор стрелец во Калчото зад убедливо водечкиот Лаутаро Мартинес со 19.
