Искусниот македонски репрезентативец Езѓан Алиоски даде свое видување за претстојното отворање на кваификациите за пласман на ЕУРО 2024.
Фудбалската репрезентација на Македонија в четврток против Малта во Скопје го отвора новиот циклус квалификации. „Рисовите“ се фаворити, но тоа ќе мора да го докажат на зелениот терен.
„Среќни сме што после неколку месеци повторно се собираме со репрезентацијата на Македонија. Започнуваме нов квалификациски циклус и секако дека посакуваме победа над Малта и старт со три бода“, вели Езѓан Алиоски, кој со 63 настапи и 12 гола во дресот со сонцето е еден од најискусните во тимот на Благоја Милевски.
„За нас е исклучително важно успешно да ги започнеме квалификациите затоа што потоа ни следуваат многу посериозни натпревари во силната група со Англија, Италија и Украина“.
„Посакувам сите да бидеме здрави и комплетни, и верувам дека ќе го дадеме најдоброто од себе. Ќе се обидеме да одиграме одлични натпревари за успешни квалификации после историските резултати во последните години“.
Натпреварот Македонија - Малта се игра в четврток, 23 март, со почеток во 20:45 часот на Националната арена „Тодор Проески“ во Скопје. Картите веќе се во продажба.
